Cas di Titi
E edificio di MFA Noord ta wordo dedica na un persona ehemplar di bario y ta haya e nomber di ‘Cas di Titi’, asina dunando honor na Sra. Titi Tromp.
Biografia
Estefana, Gregoria Tromp-Gil, mihor conoci como Titi a nace dia 28 di November 1927 na Noord. Titi a casa cu Sr Pablo Tromp y hunto nan a haya 12 jui.
Segun e yiunan ta crece Titi a cuminsa dedica tempo na organisa actividadnan social y recreativo pa su juinan y pa muchanan den bario. Akinan su pasion pa trabou voluntario y comunitario a cuminsa y Titi a bira miembro di directiva of di commicion di diferente clubnan social, cultural y deportivo.
Titi tawata y ainda ta activo riba diferente terenonan, manera terenonan social, cultural, deportivo y trabounan voluntario y comunitario pa por ehempel sigui promove cultura di Aruba y idioma materna Papiamento.
Den añanan 70 Titi tawata miembro di diferente commicion. Manera di Centro di barrio Noord, cu e tarea principal pa recauda fondo pa CBN por haya por ehempel un speeltuin, di un di e prome commicion di mayornan di Aruba, esun di districto di Noord pa mayornan di muchanan cu tawata bai scol primario y di commicion di conseho parochial y asistencia social Noord.
Titi ta un amante grandi di cultura di Aruba; entre otro Carnaval, Dande y Dera Gai.
Pa mas cu 40 aña Titi tawata tin su mes un grupo di Carnaval.
Generacionan di muchanan di bario di Noord a bai den carnaval cu grupo di Titi. Cu un grupo grandi di boluntarionan Titi tawata percura cu muchanan di bario di Noord por a experencia y disfruta di carnaval.
Cariñosamente yama mama di carnaval di Noord Titi ta participa ainda den Carnaval den barrio di Noord dor di ta habri e sunset parade Noord pa un par di añanan caba.
Como miembro di grupo di personanan cu a inicia Museo Historico Arubano, Titi a pasa den barionan na Noord pa papia cu habitantenan en busca di artefactonan di antes pa exposicion den museo. Pa su trabou incansabel a dedica un exposicion permanente den e museo cu yama “Cushina di Titi”.
Titi ta un persona cu activamente ta promove nos idioma Papiamento.
Esaki Titi ta haci den diferente manera. Por ehempel riba invitacion di docentenan Titi ta bishita diferente scolnan primario y secundario pa conta storianan di con bida di antes tawata. Uzando palabranan cu no ta wordo uza hopi mas of splica muchanan kiko ta por ehempel “1 chilin”, “1 doria” of “1 cabeiboto” . Asina Titi ta contribui na mantencion di nos historianan oral.
Scirbi poesia, obranan di teatro y buki na Papiamento tambe ta algo cu Titi ta gusta haci. Tema favorito cu ta bini bek den obranan di teatro of poesianan ta trata e hende muher unda ta expresa e lucha constante pa progresa den bida. Cu un di e poesianan aki Titi a jega di bira ganadora di festival Arte di Palabra 60-plus.
Titi ta, conhunto cu miembronan di Grupo Unie, co-excritoria di un buki di medicina di tera. Tambe Titi tawata activo como actor den diferente obranan teatral di por ehempel Amy Lasten y Carmen Hererra.
Pa tur e trabou y aporte nan aki Titi a ricibi diferente reconocimentonan.
Ehempel nan ta :
- Condecoracion di Reino Hulandes “Ridder in de Orde van Oranje Nassau”
- Pin di oro fundacion 18 di Maart pa contribucion na cultura di Aruba
- Reconosemento di “Fundacion Lanta Papiamento”
- Premio promocional Santa Anna pa su trabounan comunitario
- Reconosemento museo Historico cu exposicion permanente “Cushina di Titi”
- Reconosemento di festival di Dande “madrina di Dande”
Activo como miembro of coordinadora den diferente organicacionan cultural, deportivo, social y religioso.
- Legion di Maria di Noord
- Asistencia Social Noord
- Comision di mayor di scol basico na Noord (anna school)
- Di directiva di Museum
- Comision 100 aña di fiesta di St Anna school y Comision di fiesta di misa St Anna 200 aña
- Miembro di bestuur di diferente clubnan social, cultural y deportivo
- Actor den obranan teatral
- di Grupo Unie, grupo di damanan grandi di Noord
- Club deportivo Noord Masters y SV deportivo Corona