Cas di Mito

E edificio di MFA Paradera ta wordo dedica na un persona ehemplar di bario y ta haya e nomber di ‘Cas di Mito’, asina dunando honor na Sr. Mito Croes. Antonito ‘Mito’ Gordiano Croes a nace 10 di mei 1948 y a fayece 7 di augustus 2016. Un persona cu un curriculum vitae asina largo y impresionante. Mito a studia Ley na Tilburg y a hasi su post graduado riba International Protection of Human Rights na Institut Inernational des Droits de l”Homme, Staatsburg, Francia. Na 2006 a doctora na Universidad di Tilburg cu su Tesis ‘De herdefiniering van het Koninkrijk’.

Den su bida Mito Croes a ocupa posicion di referendaris, director, hefe suplente di diferente departamento di gobierno y alaves a ocupa varios puesto den comision, fundacion y gruponan di trabou. Tambe Mito a fungi como miembro di parlamento pa Antias Hulandes y Aruba, minister cu diferente cartera pa pais Aruba y como minister plenipotenciario di Aruba na Hulanda.
Te cu mei 2016, Mito tabata miembro di Raad van State, e organo mas halto y influyente den Reino Hulandes. Mito Croes a wordo condecora na 1978 door di Presidente di e Republica di Venezuela den Orde Francisco de Miranda y na 1990 door di su Mahestad Reina Beatrix como Ridder in de Orde van de Nederlandse Leeuw.

• Un experto den ley y conserhero grandi di pais Aruba y gobernacionnan
• Un persona cu hopi conocimento riba tereno constitucional di nos pais, Antias y tambe Reino Hulandes
• Un persona cu a scirbo bukinan cientifico valioso e.o. tocante posicion di Aruba den Reino Hulandes y ‘nieuwe verhoudingen in het Koninkrijk der Nerderlanden’
• Un persona cu a para riba e derecho di status aparte y no independencia
• Un visionario cu a wak con Aruba por wordo poni riba mapa mundial siendo parti di Reino Hulandes