Cas di Shon Lang

E edificio di MFA Savaneta ta wordo dedica na un persona ehemplar di bario y ta haya e nomber di ‘Cas di Shon Lang’, asina dunando honor na Sr. Supriano van der Linde. Supriano van der Linde, cariñosamente yama ‘Shon Lang’, a nace na Aruba dia 26 di september 1932. Su matrimonio cu Sra. Rosa Maria Geerman a wordo bendishona cu seis yiu cu tambe a hereda e talento musical. Hunto cu su yiunan, Shon Lang a graba diferente disconan, Long Play y CDnan di tanto musica ranchera como folklore di Aruba y a comparti escenarionan importante den e mundo farandulero y a participa den diferente shownan na e.o. Mexico, Hulanda, Belgica, Alemania como tambe na Boneiro y Corsou.

Na 1949, Shon Lang hunto cu su omo y primo a lanta ‘Trio Savaneta’, e prome trio di Aruba. Na total e trio a graba dies disco na Papiamento cu piesanan di largo duracion yama ‘casuela’. E trio aki tambe a forma parti di ‘Mariachi Flor de Mayo’. Dia 16 di mei 1956, tata di Shon Lang a funda ‘Mariachi Perla di Aruba’. Na 1959, Shon Lang a bira dirigente di e mariachi y na 1988 a pasa e mariachi over pa su yiu Miguel. Durante su periodo como dirigente, Mariachi Perla di Aruba a graba varios cancion componi pa Shon Lang y a comparti tarima cu hopi otro artista internacional, como tambe den diferente festival y conciertonan unda cu ela ricibi diferente premio y reconocimento.

Shon Lang tabata stima su folklore y tabata conoci pa su paranda di aguinaldo di Pasco y Dande pa Aña Nobo. Tipico Perla di Shon Lang a competi y gana hopi biaha den varios festival tanto di fin di aña y 18 di maart. Shon Lang a fayece dia 19 di april 2012 na edad di 79 aña. Su herencia musical ta continua cu su nietonan y bisanietonan tanto den areglo, composicion y canto.

Scroll To Top